Aina Mbili (2) Za Mabadiliko Na Namna Ya Kuyatumia Katika Kupangilia Maisha Yetu Ya Sasa Na Baadae.

Habari rafiki, ni matumaini yangu kuwa hu mzima na unaendelea vyema katika kupambana ili kujiletea mafanikio, naomba nikupongeze sana kwa uamuzi huo uliouchukua maana ni uamuzi wa msingi sana na wenye tija. Karibu tujifunze kwa pamoja leo aina mbili za mabadiliko na jinsi ya kuyatumia mabadiliko haya katika kupanga maisha yetu ya sasa na baadae.

Katika maisha tunayoishi kuna mabadiliko ya aina mbalimbali ndio maana ulivyo leo hii sio kama ulivyokuwa miaka mitano huko nyuma wala sio kama utakavyokuwa miaka kumi au mitano ijayo mbele. Lakini yote hii itategemeana na ni kwa jinsi gani umeweza kupambana katika kuhakikisha kuwa unayatumia mabadiliko katika maisha yako.

Aina ya kwanza ya mabadiliko ni mabadiliko yaliyopo katika mzunguko yaani mabadiliko haya huwa ni ya vitu ambavyo huwa vinajirudia na marudio yake yamefanya iwe mazoea kwetu. Mfano wa mabadiliko haya ni kama vile kupanda na kuvuna, kuzaliwa na kufa, majira ya mwaka, soko la hisa n.k. Ukitazama mifano hii mfano, mfano wa soko la hisa utakuja gundua kuwa kuna wakati bei ya hisa huwa chini na kuna wakati huwa juu, hivyo basi kwa aina hii unaweza kujiwekea malengo ya wakati fulani. Mfano ukanunua hisa leo ukakaa nazo mpaka utakapo kuja kuona bei ni nzuri na yenye tija ndipo unaziuza lakini kutokana na mzunguko wa pesa unaweza kutabiri soko la hisa litakuwaje na maisha ya wafanyabiashara wa hisa yatakuwaje.

Kupitia majira ya mwaka unaweza kutambua kuwa kipindi hiki ni cha kufanya shughuli fulani na kipindi hiki sio cha shughuli fulani hiyo ni katika kutazama maisha ya sasa, lakini katika kuyatazama maisha ya baadae unaweza kuangalia mabadiliko ya majira na ukatabiri kitu na hatimaye ukachukua hatua. Mfano mabadiliko ya majira katika baadhi ya sehemu yanaweza kuashiria kuwa kuna baadhi ya sehemu huko mbeleni zitakuwa jangwa n.k.

Aina ya pili ya mabadiliko ni mabadiliko ya moja kwa moja, aina hii ya mabadiliko ni mabadiliko ambayo hayapo katika mzunguko yaani  yakitokea hayarudi tena sio kama kuvuna na kupanda ambako hujirudia hapana, mabadiliko haya huwa kama kuchomwa kwa karatasi yaani ikiungua yanakuwa majivu na majivu hayawezi kurudi kua karatasi tena. Hapa ndipo nataka nipasisitizie kwa makini sana. kutokana na sababu mbalimbali ambazo zimekuwa zikijitokeza hapa duniani zimekuwa zikileta mabadiliko ya moja kwa moja ambayo hayawezi kujirudia tena. Mfano katika sehemu ambazo kwa sasa zinajengwa barabara za lami kuna kuwa na fursa mbalimbali, mfano watu kuajiriwa katika vitengo mbalimbali, kuna wanaoweza pata manufaa kutokana na kupangisha nyumba kwa wafanyakazi, wengine wakapata fursa ya kuuza chakula n.k. haya ni mabadiliko ya moja kwa moja.

Kwanini ni ya moja kwa moja kwa sababu fursa hiyo haiwezi kujirudia tena, kwa nchi yetu hii lami ikiwekwa ndo ishatoka hakuna kuweka lami mara nyingine yanabaki ni marekebisho madogo madogo tu. Hivyo leo hii jua kucheza na mabadiliko haya ili uweze kuja kuishi vizuri baadae maana ukishindwa utakuja kupata shida baadae.

Tumejifunza aina mbili za mabadiliko, mabadiliko yaliyo katika mzunguko na yale yasiyo katika mzunguko au mabadiliko ya moja kwa moja, lengo ni kutaka wewe kuyasoma haya na uanze kuchunguza fursa zilizopo hapo ulipo na ni vipi zinaweza kukunufaisha leo, kesho na miaka mingine huko mbele. Nikutakie kila kheri katika kuyatumia mabadiliko haya.